حقرب لتا أكبر كذبة باش بعض زعماء الأحزاب ياخذو عليها الدعم ويدخلو ولادهم وصحاباتهم للبرلمان والوزارات ومؤسسات الريع والتعويضات ويحققو مستقبل مضمون بأقل ثمن..
**شوفو آش واقع دابا في مريكان !!
فكلما ختر الواحد في السياسة.. ودَّا وجاب.. ودلفقاتو الدنيا والوقت.. وحنكاتو التجارب والصراعات والحروب واللجان والسهير والسفر الطويل.. وطيح سنانو في الخدمة والنقاش والإقناع وصياغة التقارير والقرارات ومشاريع القوانين.. كلما الموتور كيسخن مزيان وكيعطي بزاااف…
بايدن وترامب على سبيل المثال:
**الأول.. نهار 20 في هاد الشهر غادي يكمل قياس الخير 78 عام.. دوَّز 55 عام منها في السياسة الحقيقية بمجلس الشيوخ واللجان الخارجية، وكيطير مع الطيور.. وجوج مرات وهو نائب رئيس دولة.. ومازال كيجري طولا وعرضا في قارة الولايات المتحدة شاسعة الأطراف، وكيعطي التصريحات وحاضر في الندوات والنقاش العمومي، ومازال طامع يكون رئيس دولة لأربع سنوات على الأقل.. وانتم تعرفون المجهودات الجسدية والنفسية الكبيرة التي يبذلها رئيس من حجم أمريكا.
**أما الثاني.. بلا مندوي عليه.. يكفي أن اقول أن كورونا بجلال قدرها دخلت عندو مادات منو لا صح لا باطل.. طلبت منو التسليم وجمعت شطايطها ومشات فحلاتها..
ترامب تزاد في 14 يونيو 1946..أي سلخ حتى دابا واحد 74 عام.. ومازال كيتبورد وخالق البلبلة في العالم ويقدر يجري معاك من هنا لافران ونتا تعيا وهو لا… السيد حتى هو شابع تجارب لمدة 54 عام تقريبا.. وكاااع لحوايج للي يمكن تخيلها على بالك دارها… ودار كثر منها.. وبتخراج العينين الله يخليك…
**هادي هي السياسة..
كلما خترتي فيها قد ما كتعطي بزاااف وكترزن بزاااف ماشي بحال ماكرون للي كيطير من المقلة بقلة التجربة..ودابا نايضة عندو هيلالة في فرنسا، بسبب تصريح صيباني حول الإسلام.
**شحال من واحد غادي يكول ليا دابا كاينين “شباب” وزراء ورؤساء حكومات في دول في أوربا، غادي نجاوب بالخف أن هذه الدول تعيش الرفاه السياسي والبريستيج الديمقراطي..لان الشيوخ ديالهم.. سلاو.. وطراصاو الطريق ورجعو اللور وكيتفرجو دابا في ولادهم وأحفادهم شادين المقود..
**في ميركان حالة خاصة (باستثناء أوباما للي عندو مواهب خارقة)، خاصك تكون دوزتي بزاااف في عمرك..باش تشد الصنعة وتشد حتى الصف وتمحن بزاااف..وشوف تشوف واش تجيك النوبة ولا لا…
هادي هي السياسة والحكم..
ماشي معلقة من ذهب، أو خالتي في العرس.
لكن مجهود جبار وتقطاع الصباط واستحقاق وجزاء كيعطيه ليك الناخب في انتخابات ديمقراطية..
